Corse Net Infos - Pure player corse

Croneca : U GFCA Volley, cunniscite?


Antone Astima le Mercredi 19 Octobre 2016 à 19:16

L’altru ghjornu, aghju fattu a discurzata cù una amicu chì ghjunghjia da u Cuntinente (quallà diciarianu certi…). Avemu parlatu di u ghjocu à ballò. Eiu, fieru, aghju parlatu di u Sporting, chì ghjoca in Lega una è bè dapoi anni è anni, di a so cuppa di Francia, di l’ACA u so centru di furmazione, e so sette staghjone in L1, i so 20 anni di prufessiunalisimu, è, di sicuru, di u Gazelec, i so percorsi in cuppa, i so famosi ghjucadori, a L2, a L1 l’annu scorsu, a so Pignatta di Mezavia, ecc, ecc, ecc. In fattu, eru fieru di mustrà u valore di nostru ghjocu à ballò



Croneca : U GFCA Volley, cunniscite?
U tipu mi fighjulava è d’un colpu, mi sciacca : « Cunnosci u Volley ? ». Sicuru, ch’è u cunnoscu, cù i so tamanti ghjucadori à l’usu pal’à fasgioli. Ma, ci hè poca affare à dì, ch’ella hè poca cunnisciuta issa disciplina. Ma, a dilla franca, ne cunnisciu pocu nantu à u Volley.
Tandu, aghju amparatu ch’ellu hè à i JO, ch’elli ci so 5 000 personne in Greccia o in Italia, campiunatu rinumatu. Ma, ellu m’hà parlatu di…u Gazelec !
Sicuru, a squadra di ballò. Innò, innò, hè una squadra di Volley. Una squadra di Volley in Aiacciu, quessa, ùn la sapiu.
Pensate ! Per noi, fora di Timizolu, Furiani o Mezavia, ùn ci hè nulla ! « C’est là qu’ça s’passe » dicenu l’altri. E a sapete ch’eu, cercu à sdrughje u me ego, tandu, à u me amicu, l’aghju ascultatu. A sapete ciò ch’ellu m’hà dettu ?
Aiacciu ghjoca in Lega A dapoi guasgi vint’anni ! In trè anni, dapoi ch’ellu hè à u Palatinu (eiu pinsava ch’ellu era qualchì filmu nantu à u medievu), saria una di e squadre maiò di u campiunatu ! E, megliu, hà vintu a cuppa di Francia. E pusate, ch’avete da cascà in terra : sabbatu scorsu, hà battutu à Parrighji, in Super Cuppa di Francia.


Tandu, ch’ùn vogliu micca esse u « sameru » di serviziu, aghju fattu e ricerche nantu à Google (u mutore di ricerca) per sapè ne di più nantu à Parrighji. Oimè ciò ch’aghju scupertu !
Nove volte campionu di Francia, ùn sò quante cuppe, cuppa d’Auropa, è i ghjucadori, tutti i più forti di u so paese. Li stessa affare ch’è u PSG. E Aiacciu hà vintu di fronte à issa squadra quì.
E, ùn hè compia : U GFCA dinù, ghjoca in cuppa d’Auropa. Umbè, eiu, sempre à leghje o sente cose nantu à l’ACA, U GFCA (ballò) è l’ACA, tuttu què, ne sapiu pocu è micca.
U me amicu, m’ hà dettu dinù ch’Aiacciu hà persu duie volte, a piazza in finale di u campiunatu di Francia per pocu. E s’ellu era in finale, si ghjucava a Champion’s League. Tandu, mi so dettu ch’è t’anu soldi è  soldi quessi quì, ghjucadori auropeani maiò, addestradore famosu.
Pinsate, cum’è u football, u bilanciu u più debule di LA. Umbè ! L’addestradore hè un Aiaccinu, u dirretore spurtivu, figliolu di u presidente, li stessu, u presidente hè quì dapoi 50 anni, mette di a so stacca è l’altru figliolu, Jef, libero (micca li stessu sensu ch’è per u ballò), hà ghjucatu in Italia, u più famosu campiunatu di u mondu è in a squadra naziunale. E, dicenu ch’ellu hè u libero, u più forte mai vistu in squadra di Francia.
Umbè, quandu aghju amparatu tuttu què, sò cascatu di culu in terra !
U me amicu m’hà invitatu à andà à u macciu dumane sera à u Palatinu. Pare ch’ella ci hè un’ambianza di quelle.
Zittu ! Aghju da andà, ma, ùn dite nulla à nimu. Volley o Football, hè sempre ballò.