Corse Net Infos - Pure player corse

I Santi : Santu Lisandru Sauli


le Vendredi 11 Octobre 2013 à 01:10 | Modifié le Vendredi 11 Octobre 2013 - 01:13


Lisandru era natu in Milanu u 15 ferraghju 1534. Era di i Sauli di Genuva, una famiglia chì avia datu senatori è dogi à a Republica, veschi è cardinali à a Chjesa. À 17 anni, si face frate di San Paulu, Barnabitu cum'ellu si dice (Cf u 5 lugliu). À 33 anni, hè superiore generale di l'Ordine.


Trè anni dopu, u 10 ferraghju 1570, u papa u numineghja vescu d'Aleria. U 30 aprile, sbarca in Bastia. Hè un omu grande, magru, capellibiondu. Si stà una decina di ghjorni indì u guvernatore, chì ghjera u cuginu, è po parte per Aleria. U paese hè in ruvina è ùn li riesce di truvà una casa cù duie camere. Allora, decide di stabilissi in Tallone. Dà ordine di riparà una torra è, intantu, si ne colla in Corti. Volta à a fine di ghjugnu. A torra hè spartuta in nove cellule in tavule, duie per ellu, trè pè i frati ch'ellu avia purtatu da Milanu, quattru pè i so parenti è i so servi. U 17 lugliu scrive à u generale di i Barnabita: "Io me ne stò quà in Tallone assai quieto, e se non fosse la necessità di dovere muovermi, sarei contentissimo, in bellissimo aere, in una bella solitutine e abbondanza di cose al vivere naturale".

Iè ma, issa sulitutine li cunvene pocu, è po si ammala. Tandu, si ne và in Bastia è ci stà dui anni. In u 1572, dopu à un viaghju in Roma, si stabilisce in Algaiola, chì ghjera di a dioccesi d'Aleria. Quattru anni dopu si ne và in Corti per dui anni. In u 1578, fissa definitivamente in Cervioni a residenza di i veschi d'Aleria. Ci ghjunghje di maghju, è ci stà nove anni. Dopu à ellu, quindeci veschi ci si succederanu, sinu à a Rivuluzione francese.

Quandu Lisandru Sauli ghjunghje in Cervioni - Cerbione dicianu tandu - ci era 80 famiglie, ciò chì face, da più à menu, 400 abitanti. Cinque anni nanzu, u paese era statu brusgiatu da cima à in fondu da i Genuvesi per via chì Sampieru Corsu avia fattu una torra è ci si era furtificatu. Unipochi di paisani avianu rifattu e so case, d'altri si ne eranu andati.

A situazione materiale è murale era gattivissima: fame, pesta, guerre, sbarchi barbareschi è rapine. I capizzoni laichi eranu furdani, i preti dinù: gnuranti, indisciplinati, sempre armati, eranu di tutte e lite. È, publicamente, cuncubinarii. Un storiografu di Santu Lisandru hà scrittu: "Oziosi eranu, viziosi assai più".

Pensate à u da fà di Santu Lisandru per mette appena di ordine. È ci vole à dì ch'ellu hà riesciutu. Era un amministratore assignalatu è hà impostu a riforma decisa à u Cunciliu di Trento. Hà messu i preti à u passu è si hè fattu tene da e pupulazioni.

Subitu ghjuntu in Cervioni, hà fattu un seminariu, una cattedrale è un palazzu viscuvile. In pocu tempu, a pupulazione hà duppiatu, chì u travagliu ci era. Issa pupulazione hà riesciutu à tene qualchì annu u so vescu, malgradu i Genuvesi chì u vulianu cum'è cuaghjutore à l'arcivescu di a Republica.

Lisandru Sauli parte da Corsica in u 1591. U 10 maghju, u papa, Gregoriu XIV, l'avia numinatu arcivescu di Pavia.

L'annu dopu, l'11 uttobre, si ne more.

Hè statu beatificatu quasi 150 anni dopu, u 23 aprile 1741. Ci vulia dui miraculi novi per esse santificatu è ùn ci ne era chè unu. U secondu miraculu u deve à una Cerviuninca, Maria Filippina Canessa, nata u 15 aprile 1876, figliola di Simon Ghjuvanni, un scarparu di urigine taliana è di Maria Paula Bereni. Maria Filippina avia una tisia scrufulosa è a famiglia si ne era andata in Bastia. U 19 marzu 1899 guarisce cum'è per incantu. È cusì, l'11 dicembre 1904, Santu Lisandru era canunizatu.

U 28 sittembre 1963, à a dumanda di u canonicu Saravelli è di a municipalità, Santu Lisandru era dichjaratu, da a Sacra Cungregazione di i Riti, patrone celestu di a cità di Cervioni.

Etimolugia, Casate è nomi : Cf u 22 aprile.

Paesi è cità : Pavia. Corsica (Santu Lisandru hè dettu l'Apostulu di a -), Cervioni.
Retrouvez l'émission I Santi sur Voce Nustrale
du lundi au samedi à 10h30.




Dans la même rubrique :
< >

Jeudi 24 Juillet 2014 - 00:02 I Santi : Santa Cristina

Mercredi 23 Juillet 2014 - 00:49 I Santi : Santa Brigida.

L'actualité | Politique | Football | Sports | Culture | PAROLES | I santi | L'anniversari | Diaspora | iPhone | Avis de décès




Derniers tweets
Corse Net Infos : "Bastia : "Du texte à l'image", un festival pour 1 3 00 scolaires" : https://t.co/bVlUq6ikti via @YouTube
Dimanche 17 Décembre - 11:25
Corse Net Infos : #Bonghjornu #Bonjour U Palazzu Lantivy in #Aiacciu https://t.co/zXzC9VAAdu
Dimanche 17 Décembre - 09:48
Corse Net Infos : Miss France et la question des téléspectateurs : Eva Colas au-dessus du lot https://t.co/8aqJ7DWgc3 https://t.co/PgIYNdOFXz
Dimanche 17 Décembre - 09:34
Corse Net Infos : Consultez la #météo #corse en permanence et en direct sur #CNI https://t.co/n8GcKLIvbV
Dimanche 17 Décembre - 09:33


Newsletter







Galerie
Challenge de Noël du FC Squadra Calvi
Challenge de Noël du FC Squadra Calvi
Parade Noël Ajaccio
Parade Noël Ajaccio
Sainte Barbe
Sainte Barbe
U Babbu Natale
U Babbu Natale
Conseil départemental 2 B
Conseil départemental 2 B
ACA-Auxerre
ACA-Auxerre
Communauté de communes L'Ile-Rousse Balagne
Communauté de communes L'Ile-Rousse Balagne
CCAS de Calvi
CCAS de Calvi