Corse Net Infos - Pure player corse

I Santi : Santu Lazaru u pittore,Santu Policarpu


Rédigé par le Samedi 23 Février 2013 à 00:15 | Modifié le Vendredi 5 Avril 2013 - 01:52


Lazaru era un frate di Custantinopuli chì pinghjia figure sacre à l'epica iconoclastica quandu, da 725 à 842, sciappavanu è brusgiavanu e riprisentazioni di Diu è di i santi. Versu l'annu 830, l'Imperatore Teofilu u fece arrestà è li fece brusgià e palme di e mani. L'imperatrice Teodora u piattò, u curò è u guarì, è Lazaru riprincipiò à pinghje.


À a morte di u maritu, l'annu 842, Teodora ebbe a regenza per quattordeci anni. Fece stancià a guerra di e figure chì durava da più di un seculu. Lazaru fù incaricatu di andà in Roma à danne a nova à u papa.
Certi pretendenu chì, vultendu da Roma, u battellu si hè affundatu è Lazaru hè mortu annegatu. D'altri dicenu ch'ellu hè mortu in l'867, dopu à avè ricusatu di pregà pè u boia chì l'avia marturiatu.
Etimolugia : V. Lazaru (17 dicembre).

Policarpu hè u secondu di i martiri cunnusciuti, u primu essendu San Stefanu. Hè mortu in l'annu 155, in Smirne.
Era statu un discepulu di San Ghjuvanni l'Evangelistu è avia cunnusciutu quelli chì avianu cunnusciutu à Ghjesù. Santu Ireneu conta chì Policarpu li dicia: "Iè, l'aghju po cunnusciutu benissimu à San Ghjuvanni. Mi pare di vedelu ancu avà. Si calava accantu à noi altri zitelli, è ci ripetia e parulle di l'apostuli è quelle di Ghjesù".
Policarpu era vescu di Smirne quand'ellu fù ubbligatu di piattassi per via di e persecuzioni. Si era rifugiatu in u granaghju di una casetta, ma fù traditu da un giovanu servu torturatu da i suldati. L'anu purtatu davanti à u proconsule chì li prumettì di salvalli a vita s'ellu rinnegava a so fede.
"Facenu 86 anni ch'appartengu à u Signore, disse Policarpu, ùn mi hà fattu nisun male, è vulite ch'o u rinneghi? Mancu à pensalla!"
Allora u purtonu nantu à un legnaghju per brusgiallu vivu. Ricusò di lasciassi lià mani è pedi è si messe à pregà mentre ch'elli zingavanu focu. Ci hè vulsutu chì i suldati u difiniscanu à stilettate, chì e fiastare l'allisciavanu senza brusgiallu.
Etimolugia : da u grecu "polus" (assai) è "karpos" (fruttu).
Retrouvez l'émission I Santi sur Vo  ce Nustrale  du lundi au samedi à 10h30.




Dans la même rubrique :
< >

Jeudi 24 Juillet 2014 - 00:02 I Santi : Santa Cristina

Mercredi 23 Juillet 2014 - 00:49 I Santi : Santa Brigida.

L'actualité | Politique | Football | Sports | Culture | PAROLES | I santi | L'anniversari | Diaspora | iPhone | Avis de décès | Le courrier des lecteurs