Per risponde à a dumanda di l'imperatore Ferdinandu Secondu, ista festa hè stata intrudutta da Paulu Quintu, papa da u 1605 à u 1620, per esse celebrata in Germania è in Austria a prima dumenica di sittembre è, in l'altri paesi, a prima dumenica dopu à San Michele. Ghjè u papa Clemente Decimu chì, in u 1670, l'hà fissata à u 2 uttobre è l'hà resa ubligatoria in a Chjesa Universale.
Liceriu era u vescu d'Augustudunum, l'attuale cità d'Autun, in u dipartimentu di a Saône-et-Loire.
À u seculu settimu, Battilda era maritata cù Clodoveu Secondu, rè di a Neustria è di a Burgogna. Avianu trè figlioli: Cluttariu, Childericu, è Teodoricu.
Clodoveu more à 23 anni. Ella, chì ne avia 21, diventa regente. Avia cum'è cunsiglieru à Liceriu, ch'ella face vescu di Augustudunum l'annu 663. Supprime u cummerciu di i schjavi è di e cariche ecclesiastiche, rende l'impositi più ghjusti, è favurizeghja u sviluppu di a vita munastica.
L'annu 669, Cluttariu diventa rè. Rinvia à Liceriu in a so dioccesi, chjude a mamma in un cunventu, è face di un certu Ebroiu u maggiordomu di u palazzu.
Cluttariu more l'annu 673. Childericu li succede. Face rivene à Liceriu è scaccia à Ebroicu chì ghjura di vendicassi. Childericu era beidore è licenziosu. Ùn pobbe suppurtà i rimproveri di Liceriu è, un ghjornu ch'ellu era briacu, pruvò ancu à tumballu. È po u rimandò in a so dioccesi.
Childericu hè assassinatu l'annu 675. Teodoricu diventa rè è lascia à Ebroicu fà l'accampu di Augustudunum. Per chì a cumunità ùn morga di fame, Liceriu si rende. Ebroicu li face taglià a lingua, brusgià l'ochji, è u chjude in un cunventu di sore. Adunisce una assemblea in Fiscanum, l'attuale cità di Fécamp, in u dipartimentu di a Seine-Maritime, assemblea chì dichjara chì Liceriu era indegnu di esse prete, è u cundanna à morte. Hè statu scapatu in un boscu accantu à a cità. Era versu l'annu 679.
Retrouvez l'émission I Santi sur Voce Nustrale du lundi au samedi à 10h30.
Envoyer à un ami
Version imprimable
