San Fiurenzu : cusì bella edizione di Sant'Andria

U cantu, tutti i zitelli u cunnìscianu, Chloé interrugata da u nostru u ci canta senz'altru : "Sant'Andria, Sant'Andria,eccu vi a cumpagnia ind'è voi emu da cantà, ruspulà eppo scappà, San Martinu sia per tè a to casa è a to ghjente, Sant'Andria Sant'Andria avà pigliemu a via..."

Cantu ma dinù pregantule, a ci dichjama Ghjulia Maria 2 anni è mezu : "Aprite aprite à Sant'Andria chì vene da longa via hà i pedi cunghjalati è hà bisognu di riscaldassi cù un bon bichjeru di vinu".
Oltre l'aspettu lùdicu, s'era impegnata davveru a Cunfraterna inde un'andatura di spartera, sulidarità ma dinù di pedagugia, a ci conta Rumanu Giorgi unu di l'urganizadori di a manifestazione : " Emu vulsutu quist'annu dinù impegnà l'associu Aiutu Studientinu chì u cunniscimu u soiu l'impegnu di pettu à a precarità studientina in Corti, per quessa trè punti di racolta sò stati pruposti à u cullegiu è a scola di San Fiurenzu, ma dinù u 30 tutta a ghjurnata in Piazza di u paese, ch'ella mi sia permessa di ringrazià l'associu, a scola è u cullegiu di San Fiurenzu è tutti quelli chì sò mossi di una manera o di l'altra ! "L'appuntamentu hà digià trovu u so publicu è siamu siguri di ritruvà li un antru annu !