Daniel Cartayrade è Louis Cesari piglianu e medaglie d'oru à u cuncorsu di l'oliu d'aliva

Stu marti matina in u CPS di corti, hè statu urganizatu da u Foyer Rural di Montegrossu è u SIDOC, l'11esimu cuncorsu regiunale d'Oliu d'Aliva di Corsica in AOP. In cumpetizione, 14 olii, 4 per a racolta à l'antica tradiziunale è 10 per a racolta annant'à l'arburu. 

" A campagna 2018/2019 si compie avà è l'ultimi mulini chjodenu attemp'avà. Avemu quasi 200 tonne d'oliu in AOP, cìò chì lascia pensà 300 in tuttu. Quist'annu duvia esse una campagna eccezziunale, ma a timpesta d'ottobre hà fattu parechji sguasti" spieca Marie-Madeleine, animatrice di u SIDOC. 

Stallati in dui gruppi, ogni ghjuratu hà valutatu ogni oliu per a so categuria. 

Tippicità, culore, muscu, gustu, tuttu hè appreziatu per ottene un fine, una nota glubale. 

Dop'à un bellu mumentu di riflessione, i vincidore sò cunisciuti. 

A medaglia d'oru per a Racolta à l'antica tradiziunale, hè stata attribuita à a Sabina di Balagna di Daniel Cartayrade di Zilia.

Per a racolte annant'à l'arburu, a medaglia d'oru per Arburi Cesari di Louis Cesari di Ghisonaccia. A medaglia d'argente per Huile du moulin de Prunete di José Rioli di Cervioni. È a medaglia di bronzu per Olivier Moratti di Santu Petra di Tenda.

"Per participà, l'olii devenu esse in AOP. Per ottene quellu aggradimentu, per pudè rivendicassi oliu AOP di Corsica ci vole chì l'oliu sia analizatu in laburatoriu è tastatu da un ghjuratu". Mentre quella ghjurnata, sò 8 olii chì sò state valutate per ottene l'AOP. 

A rimessa ufficiale di i premii si farà mentre l'inaugurazione di A Fiera di l'Alivu u sabbatu u 20 di lugliu. 

U SIDOC, u Sindicatu Interprufeziunale di l'Oleicultori di Corsica, hè un associu di pruduttori criatu in 1999 per difende è prumove l'oliu d'aliva di Corsica. 

In u 2009, u SIDOC hè statu ricunnisciutu cum'è interprufessione da u ministeru di l'agricultura. Mentre a Fiera di l'Alivu 2019, saranu festighjati à tempu, i 20 anni di u SIDOC è i 10 anni di l'interprufessione. 

Membri di u ghjuratu* : membri di l'AOP Oliu di Corsica, membri di u Foyer Rural di Montegrossu è pruduttori.