C'era un mondu scemu stu sabbatu dopu meziornu in Corti, in u scopu di participà à a prima riunione di travagliu urganizata da l'associu" Cusì".
Cù a prisenza di studienti, eletti tarrituriali, persunalità pulitiche, attori di a lingua o simplicemente persone in brama di mantenela in lingua viva.
A prima parte di 'ssu scontru s'hè fatta in l'anfiteatru Landry, induve Ghjuvan'Filippu Mattei u prisidente, Brandon Andreani u porta parola è Francescu Guerrini membru, anu prisentatu in calchì parola, l'associu è i stati generali.
"Avemu urganizatu i stati generali di a lingua corsa in u scopu d'addunisce i corsi vivi, impegnati in u diventà di a lingua, chì a difendenu è chì a volenu fà campà ogni ghjornu. Vulemu chì u Corsu sia in ogni locu, in ogni stonda è in a sucetà oghjinca. [...] Oghje avemu una missione, quella d'esse missageri di a lingua" hà spiecatu Brandon.
"Cusì", hè una cuncolta di forze vive, associ chì difendanu a lingua corsa in lisula sana, "cù a vulintà di fà calcosa ogni ghjornu, per mantenela. Chì per falla campà ci vole à praticalla. I particulari devenu fà in sorte di pudè parlà e sparghe a nostra lingua. A ghjente pudessi parlà cù azzione di a sucietà. U corsu ùn hè micca a lingua di a pulitica o una lingua sacrata mà a lingua di u pane è a lingua di tutti" hà pricisatu Ghjuvan'Filippu.
Attelli di riflessione
A siconda parte di issu dopu meziornu, s'hè urganzata in 6 attelli.
Cantu è musica induve s'hè trattatu di a piazza linguistica in u mondu di a musica è sviluppanne l'amparera.
Per u gruppu di l'amparera di a lingua, ci hè statu una riflessione cullettiva per sviluppà, migliurà è perenizà u corsu in a sucietà oghjinca. " U prublema chì si scontre spessu oghje, hè chì u corsu hè diventatu una materia sculara. In casa, si parla pocu è micca. Ci vole à truvà suluzione per fà entre a lingua in a bocca di i zitelli, fora di scola!" Dicia un prufessore.
Per l'attelli, media è internet, cumerciu, mondu artisticu è prufessiunale agricolu è artigianale, si parlava d'aduprà è sviluppà di più u corsu è racultà in fine u vucabulariu di tutti i vucabularii è sapè fà nustrali.
"U corsu, a lingua di u pane, a lingua di a vita".
Envoyer à un ami
Version imprimable
