Ci ralligremu di sicuru di tamantu successu. Emu datu a prova chì ci hè una dumanda pupulara riali, par uttena unu statutu di Cuufficialità. Ci hè 'ssa dumanda parchì a pupulazioni sà chì unu statutu pò offra i meza di custruì una sucità bislingua è chì a lingua corsa n'hà bisognu par risunà dinò in carrughju à paru cù u francesu. U votu di l'Assamblea hà presu in contu 'ssa rialità; avà aspittemu chì u Statu francesu fessi listessu... Ùn pudarà cuntinuà di fà neci d'ùn senta micca 'ssa dumanda pupulara. Casu mai, pronti semu à mubilizassi dinò è ancu di più dimustrativi saremu... Intantu tinimu à ringrazià tutti l'attori ch'ani pirmissu a rièscita di a mubilisazioni aiaccina, ricunnisciuta da tutti com'è sendu statu un ivinimentu stòricu (chì hà adunitu 250 artisti è più di 100 associa, quì è for' di Còrsica). Ringraziemu dunqua, i binivulanti: quiddi ch'ani tinutu u cuntuaru, quiddi di u sirviziu d'òrdini, i cantadori (maiori è ziteddi) è i tiatrini (pà u spittàculu), i pruduttori agrìculi di ropa casani d'alta qualità (par fà manghjà l'artisti), a municipalità è l'associu di i piscadori (pà u matiriali). È ringraziemu dinò l'altri attori ch'ani cuntribuitu à à u successu di 'ssa Manifistazioni Fistiva: a sucità di sunurisazioni (chì hà rializatu una pirfurmenza), i marcanti di vitedda arrustiti è quiddi di fritteddi, i cumircianti intornu à a piazza (chì si sò adattati à l'ivinimentu), a sucità di sicurità, i sponsor, i media è i publicisti. L'unioni era maiori è i pulìtichi di tutti i tindenzi èrani quì par illustralla com'è ani sappiutu illustralla i club di süporter di ballò, tinendu insembu a listessa bandarola chì purtaia a rivindicazioni ch'è no clamemu tutti d'una sola boci: Cuufficialità!
PS: sarà tirata à l'imbusca u 25 di ghjunghju è à nantu à l'onda d'Alta Fraquenza, a tòmbula di u Cullittivu (urganizata in u quatru di a mubilisazioni di maghju scorsu).
Envoyer à un ami
Version imprimable
