Corse Net Infos - Pure player corse

I Santi : Santa Margarita di Scozia, Santa Gertrude.


le Vendredi 16 Novembre 2012 à 02:00

Margarita, nata verdi l'annu 1046, era una figliulina di u rè d'Inghilterra, rifugiata in Scozia quandu, in l'annu 1066, i Normani anu cunquistatu u paese.
À l'età di 26 anni, si maritava cù u rè di Scozia, Malcomu Terzu, chì n'avia 45, è li face ottu figlioli. Malcomu era assai devuzionosu, è assuciava a moglia à u guvernu di u paese.



Margherita hà riesciutu à intruduce a liturgia rumana indì a Chjesa scuzzese, è hà fattu, in Edimburgu, un munasteru nant'à u mudellu di quellu di Cluny, in Francia.
Hè morta à u castellu d'Edimburgu, u 16 nuvembre 1093, quattru ghjorni dopu chì i Normani d'Inghilterra abbianu assassinatu u maritu, chì guvernava a Scozia dipoi 37 anni.
U nome Margarita, in latinu, vole dì:"perla". U fiore hè statu chjamatu cusì per via chì avanti d'apresi s'assumiglia à una perla.
Donne chì si chjamanu Margarita ci n'hè assai in Inghilterra, in Alemagna, in Francia, in Italia. In Scozia, santa Margarita hè a santa naziunale; in u 1970, una zitella nant'à dece si chjamava Margarita.
In Svezia, in u 1950, tredeci zitelle nant'à centu portavanu u nome di Mergit.
In Francia, u nome " Marguerite" hà pigliatu dinù a forma di Daisy è Peggy.
D'apressu à Mistral, Magali hè un'adattazione provenzale di Margarita.
In u 1981, in Corsica, Margarita venia à u dicenovesimu rangu di i nomi feminili. Era quellu di sei nomi nant'à mille.
U 16 nuvembre si festighjeghja dinù à santa Gertrude, un'Alemana nata verdì l'annu 1256, morta à l'età di 45 anni.
Ùn si sà di qual'ella ne era, nè da duv'ella surtia. Ciò chì si sà, hè ch'ell'avia 5 anni quand'ell'hè stata accolta da e sore di l'abbazia d'Helfta, in Sassonia, è ci hà passatu a so vita.
In'ss'abbazia, e sore a si scialavanu: passavanu u tempu à discute filosufia, literatura, à fà è stà à sente a musica. Gertrude fece cum'è l'altre sin'à l'età di 25 anni. Hà dettu: "Di a mio anima, mi ne penserava quant'è di i mio vechji scarpi. Era una pagana, mez'à pagane". Tandu hà pinsatu à a vita eterna, si hè vista persa è hà suffertu u martire durante un mese.
Una sera, à l'attrachjata, hè affaccatu, in camera, un giovanu, assai bellu, assai distintu. Era un anghjulu chì l'annunziava l'amore di Ghjesù. Dipoi, campò in visibiliu, cun gioie imense.
Disse: "O Signore, u vostru più grande miraculu hè d'avè ublicatu a terra à purtà una peccatrice cum'è mè!"
Gertrude era pueta, è hà lasciatu scritti di gran valore spirituale è literariu. E so rime latine celebreghjanu, cù a fede cristiana, a natura, l'amore, è a morte.
Etimolugia è nomi : Cf Margherita Bourgeoys (12 ghjennaghju).
Paesi è cità : Scozia.
Prutezzione: donne in partu.
Etimolugia : da u germ. "ger" (lancia) è "trud" (fida).
Nomi : Drück, Drut, Gartrude, Geerdine, Geertruida, Geeske, Gerda, Gerdie, Gerdrugt, Gertraud, Gertraut, Gertrud, Gertruda, Gertrude, Gertrudis, Gertrut, Gesine, Getoussia, Giertru, Gletruda, Jertrud, Traudel, Truda, Trude, Trudie, Trudy, Tula, Tuta.
Retrouvez l'émission I Santi sur Voce Nustrale
du lundi au samedi à 10h30.