Corse Net Infos - Pure player corse

I Santi : Natale


Rédigé par le Mardi 25 Décembre 2012 à 01:21 | Modifié le Mardi 25 Décembre 2012 - 01:24


Si festighjeghja a nascita di Ghjesù. Sì Pasqua hè una festa istituita da i Ghjudei è adattata à a nova religione, Natale hè a più anziana di e feste sputicamente cristiane. Hè stata decisa da a Chjesa latina à u seculu quartu. A prima data sicura hè quella di 336. Pè a Chjesa d'Oriente, a festa di u 25 dicembre hè stata intrudutta in Antiocca versu l'annu 375 è in Alessandria versu l'annu 430.


A Chjesa greca celebrava a nascita di Ghjesù à l'Epifania, u 6 ghjennaghju. Quandu e duie feste sò state ritenute da a liturgia, quella di u 6 ghjennaghju hè stata riservata à a cumemurazione di l'adurazione di i rè Maggi. À u seculu sestu, anu permessu à i preti di dì trè messe, una à mezanotte, una à l'alba, è una à l'ora abituale dopu à u cantu di Terza.
U Natale, "le Noël" in francese, "Christmas", o festa di u Cristu, in inglese, "Veihnacht", o notte sacra, in alemanu, hè sempre stata una festa di gioia cù una massa di manifestazioni pupulare. Ghjè San Francescu d'Assisi chì, u primu, hà fattu un presepiu in chjesa per riprisentà u misteru di a Natività.
Altri usi sò assai più anziani è di urigine pagana per via chì Natale currisponde cù u principiu di l'invernu festighjatu in tutte e religioni antiche. L'ufferta di u viscu vene da i Galli, a decurazione di u ghjalicu vene da i Germani. In Corsica, l'incantesimi trasmessi a notte di Natale, venenu da nanzu à u Cristianisimu, ancu sì i preti ci anu intruduttu l'invucazione à Ghjesù è à Maria.
"Ancu l'usu di u focu natalecciu hè d'urigine pagana. Qualchì pochi ghjorni nanzu à Natale, i zitelli andavanu à ricoglie legne secche o à taglià gamboni verdi. A vigilia, i più chjuchi facianu l'ultima cerca pè e case: li davanu una legna di a pruvista per l'invernu, un carculellu d'accendime, una bracciata di pali à fasgioli diventati troppu corti, o un cantellacciu. I più grandi ammuntichjavanu issu legname è, à l'annuttà, ci mettianu focu. U picciafocu affaccava à a corsa da a casa a più vicina cù una scheza di deda infiarata. In u sciappittime furibondu, e fiare leccavanu i gamboni verdi, fendu cullà in u celu bughjosu nuli di calisgine. È i zitelli stridavanu: "e sdreie! e sdreie!".
Etimolugia : I primi tempi di u Cristianisimu, u latinu "dies natalis", chì vole dì "ghjornu di a nascita", era interpretatu pè i martiri è i santi cum'è "ghjornu di a nascita à a vita eterna". Si trattava dunque di u ghjornu di a morte. Più tardi, a parulla Natale hè stata data cum'è nome à i zitelli nati u ghjornu di Natale, o per ricurdà a nascita di Ghjesù. In u 1981, in Corsica, venia à u 18esimu rangu di i nomi maschili. Era quellu di 9 omi nantu à 1000.
Casate: Natali, Natalini, Natalucci, Nataloni, Nadini.
Nomi : Nacha, Nat, Natacha, Natala, Natale, Natalène, Natalia, Natalicio, Natalie, Natalina, Nataline, Natalinu, Natalio, Natalis, Natascha, Nathalia, Nathalie, Natoulia, Nattie, Nelig, Nettie, Netty, Noël, Noéla, Noèle, Noélie, Noëlla, Noëlle, Nouel, Nouela, Novela, Novella, Nowell, Tacha, Tali, Talie, Velia. Retrouvez l'émission I Santi sur Voce Nustrale  du lundi au samedi à 10h30.



Dans la même rubrique :
< >

Jeudi 24 Juillet 2014 - 00:02 I Santi : Santa Cristina

Mercredi 23 Juillet 2014 - 00:49 I Santi : Santa Brigida.

L'actualité | Politique | Football | Sports | Culture | PAROLES | I santi | L'anniversari | Diaspora | iPhone | Avis de décès




Derniers tweets
Corse Net Infos : Consultez la #météo #corse en permanence et en direct sur #CNI https://t.co/n8GcKLIvbV
Mardi 24 Octobre - 09:32
Corse Net Infos : #Bonghjornu #Bonjour Le calme après la tempête. Entre Pruprià et Senetosa https://t.co/U6moTtQIxr
Mardi 24 Octobre - 09:26
Corse Net Infos : L'édito de Jacques Renucci : La guerre du feu https://t.co/2XQzdQ2ADH
Mardi 24 Octobre - 08:31
Corse Net Infos : L'ambiance du derby : L’ACA gagne le match des tribunes https://t.co/0juse2sUw7 https://t.co/MwppcAgnd9
Mardi 24 Octobre - 08:00


Newsletter







Galerie
Restaurant universitaire
Restaurant universitaire
ACA-GFCA
ACA-GFCA
Légionnaire
Légionnaire
Feu Balagne
Feu Balagne
Arcodeca-Lycée Jean Nicoli
Arcodeca-Lycée Jean Nicoli
Fête de la Science à Lisula
Fête de la Science à Lisula
CRAB XV
CRAB XV
Corsican Circuit
Corsican Circuit